റെന്നിംഗന്‍ (ബാഡന്‍~വുര്‍ട്ടെംബര്‍ഗ്): ജര്‍മ്മനിയെയാകെ ഒന്നടങ്കം ഞെട്ടിച്ചും പ്രവാസി മലയാളികളെയടക്കം കണ്ണീരിലാഴ്ത്തിയും റെന്നിംഗന്‍ നഗരത്തില്‍ നിന്നും കാണാതായ മൂന്ന് മാസം മാത്രം പ്രായമുള്ള ആണ്‍കുഞ്ഞിന്റെ മൃതദേഹം കണ്ടെത്തി. ഹെലികോപ്റ്ററുകളും ഡ്രോണുകളും നാല്‍പ്പതോളം പ്രത്യേക പരിശീലനം സിദ്ധിച്ച നായകളെയുമടക്കം ഉപയോഗിച്ച് നടത്തിയ വന്‍ തിരച്ചിലിനൊടുവിലാണ് പോലീസിന് കുഞ്ഞിന്റെ മൃതദേഹം (Saeuglingsleiche) ലഭിക്കുന്നത്.

അമ്മ സാധനങ്ങള്‍ മാറ്റുന്നതിനിടെ നടന്ന ക്രൂരത:

വ്യാഴാഴ്ച രാത്രിയായിരുന്നു ജര്‍മ്മനിയെ നടുക്കിയ സംഭവം നടന്നത്. അമ്മ സൂപ്പര്‍മാര്‍ക്കറ്റില്‍ നിന്നും വാങ്ങിയ സാധനങ്ങള്‍ വീടിന്റെ മുകളിലത്തെ നിലയിലേക്ക് മാറ്റാന്‍ കയറിയ സമയത്താണ് താഴെ പ്രാമില്‍ (Kinderwagen) കിടന്നിരുന്ന കുഞ്ഞിനെ അജ്ഞാതന്‍ തട്ടിക്കൊണ്ടുപോയത്. വെറും മിനിറ്റുകളുടെ മാത്രം അശ്രദ്ധയിലാണ് ക്രൂരനായ തട്ടിക്കൊണ്ടുപോകല്‍ നടന്നത്.

തുടര്‍ന്ന് കഴിഞ്ഞ രാത്രി മുതല്‍ പ്രദേശമാകെ പോലീസ് കണ്‍ട്രോള്‍ റൂം തുറന്ന് വന്‍ തിരച്ചില്‍ നടത്തിവരികയായിരുന്നു. പ്രദേശത്ത് കടുത്ത ചൂട് (Heatwave) നിലനില്‍ക്കുന്നതിനാല്‍ കുഞ്ഞിന്റെ ജീവന് അപകടമുണ്ടാകുമോ എന്ന് പോലീസ് ആദ്യമേ ഭയപ്പെട്ടിരുന്നു. ഒടുവില്‍, മൃതദേഹങ്ങള്‍ കണ്ടെത്താന്‍ പ്രത്യേക പരിശീലനം ലഭിച്ച 'Leichenspeurhunde' (Cadaver dogs) നായകളുടെ സഹായത്തോടെ നടത്തിയ തിരച്ചിലിലാണ് കുഞ്ഞിനെ ജീവനറ്റ നിലയില്‍ കണ്ടെത്തുന്നത്.

അന്വേഷണം കൊലപാതകത്തിലേക്ക്:
കുഞ്ഞിന്റെ മരണം സ്ഥിരീകരിച്ചതോടെ പോലീസ് കേസ് കൊലപാതക അന്വേഷണത്തിലേക്ക് (Mordermittlung) മാറ്റിയിരിക്കുകയാണ്.

ആരാണ് കുഞ്ഞിനെ പ്രാമില്‍ നിന്നും എടുത്തുമാറ്റിയതെന്നും, മരണത്തിലേക്ക് നയിച്ച കാരണം എന്താണെന്നും വ്യക്തമല്ല. പ്രതിയെ കണ്ടെത്താനായി ഫോറന്‍സിക് വിദഗ്ദ്ധരും പ്രത്യേക അന്വേഷണ സംഘവും പ്രദേശം വളഞ്ഞ് തെളിവുകള്‍ ശേഖരിക്കുകയാണ്. ഒരു അമ്മയുടെ ചെറിയൊരു അശ്രദ്ധ വലിയൊരു ദുരന്തത്തില്‍ കലാശിച്ചതിന്റെ ഞെട്ടലിലാണ് ഇപ്പോള്‍ ജര്‍മ്മനിയിലെ പ്രാദേശിക സമൂഹം.